Осы уақыт ішінде өзіндік дәстүрлер қалыптасып, көпшілікке танылған жобаларымыз бар.
Тамыз айында өткен тамыз конференциясында ҚР Оқу-ағарту министрлігі Орта білім комитеті төрағасының орынбасары Жомарт Петрович Карамбаев «Мағжан оқуларына» ерекше тоқталып, оны өңірдің нағыз брендіне айналып, ел көлемінде танымал болған байқау ретінде атап өтті. Сондай-ақ Петропавл қаласында өткен, еліміздің барлық өңірінен қатысушыларды біріктірген шетел тілдері пәні бойынша республикалық олимпиаданың жоғары деңгейде ұйымдастырылғанын атап өтіп, оны өткізуге атсалысқан облыс әкіміне алғысын білдірді.
Соңғы уақытта «Мағжан оқулары» қатысушылар, ұстаздар мен қонақтар тарапынан көптеген жылы лебізге ие болды. Осындай жоғары мінберден айтылған бағаны есту біз үшін ерекше қуанышты. Бұл бізге шабыт береді.
Әр шараның артында – адам. Жауапкершілік, іске деген адалдық және тынымсыз еңбек тұр. Көп жағдайда көпшілікке көрінбей, тасада қалатын жандар күн сайын дайындық жасап, ұйымдастырып, қарсы алып, бірге жүріп, жобалардың мазмұнын қалыптастырып, ондаған маңызды істі назарда ұстайды.
Осындай еңбектің нәтижесі кәсіби жетістіктерден де көрініс табуда.
Конина Асем Жанайдаровнаға, Ильясова Ильвира Ришатовнаға және Нургалиев Саят Касымовичке «модератор» біліктілік санаты берілді.
Кабдуллина Алима Есенгельдиновна мен Иманбекова Жулдызай Бакытовна магистр дипломдарын үздік бағамен алды.
Какенов Дархан Кадыржанович Білім басқармасының Құрмет грамотасымен марапатталды.
Әріптестер, шын жүректен құттықтаймыз! Кәсіби дамудың әрбір қадамы қуаныш пен қанағат сыйлап, алда әлі талай қызықты міндеттер мен мақтан тұтар сәттер көп болсын!
